Шәвәлиевлар династиясе

Бүздәк төбәге республикага бик күп күренекле табиблар биргән. Бу җәһәттән танылган хирург Әхмәт Кадыйров, табибә, Дәүләт җыелышы-Корылтай депутаты Римма Үтә­шева исемнәрен атап үтү дә җитә. Фидакарь хезмәте өчен алар сафына Башкортстанның атказанган табибы Равил Шәвәлиевны да куярга мөмкин.

Равил Табанлыкүл авылында туып-үскән. Һөнәр сайлар вакыт җиткәч, үсмер өстенлекне сәламәтлек саклау өлкәсенә бирә. Медицина институтын уңышлы тәмамлап, хирург белгечлеге буенча хезмәт юлын башлый.

Хәзерге вакытта Баш­­кор­т­станның атказанган табибы, утыз елдан артык хезмәт тәҗрибәсенә ия Равил Рәшит улы Башкортстан дәүләт медицина универ­ситетының икенче клиникасы хирургия бүлегенә җитәкчелек итә. Республиканың сәла­мәтлек саклау тармагында әйдәүче учреж­де­ниеләрнең берсе буларак, биредә заманча җи­һазлар урнаштырылган, алар халык сәламәтлеген тәэмин итү максатында нәтиҗәле файдаланыла. Коллективта үз эшен намуслы башкаручы тәҗрибәле бел­гечләр тупланган. Табиблар Ростислав Лихтер, Руслан Гомә­ров, Рөстәм Абдрахманов — нәкъ шундыйлардан. Өлкән шәф­кать туташы Римма Әһл­и­уллина, шәфкать туташлары Розалия Хәмәт­гәрәева, Әл­фия Әхмәтгалиева һәм Зимфира Нургалиева дәвала­нучыларга күңел җылысын кызганмый өләшә.

Медицина университеты профессоры, фән докторы Равил Шәвәлиев гыйльми эшчән­лекне дә киң колач белән алып бара.  Ул — өч йөзгә якын фәнни хезмәт, өч  монография, күпсан­лы укыту-методик әсбап­лар авторы. Равил Рәшит улы медицина өлкәсендә уйлап табучы бу­ларак та танылу алды, бу юнә­лештә гомум һәм абдоминаль хирургия буенча 14 таныклыгы бар. Медицина уку йортында госпиталь хирургиясе кафедрасы профессоры буларак, яшь алмаш әзерләү буенча эзмә-эзлекле эш алып бара, фән казанышларын халык мәнфәгать­ләрендә куллану өчен армый-талмый эшли.

Шәвәлиевлар гаиләсендә табиб һөнәренең өстенлекле урын алып торуы табигый. Равил Рәшит улының җәмәгате Фәнисә Абдулла кызы —  Г. Куватов исе­мендәге Республика дәва­ханә­сенең гинекология бүлеге мөдире, хезмәт стажы утыз елга якын. Уллары Рафаэль, хезмәт­тә әтисе юлын сайлап, Уфаның абруйлы хирургларының бер­сенә әверелде, медицина фән­нәре кандидаты гыйльми дәрә­җәсенә ия. Аның хатыны Алина республика Кардиология диспансерында хезмәт сала. Династия башлыгының кызы Карина ире Юлай Борһанов белән — офтальмологлар. Табиблар династиясе халык сәламәтлеге сагында ышанычлы тора.

Дмитрий Макиша.