Фидакарь хезмәт лаеклы бәһаләнде

Узган җомгада Уфада Русия Федерациясенең  Элемтә һәм киң­күләм коммуникацияләр министр­лыгының Мактау грамоталарын тапшыру тантанасы узды. Бу дәрә­җәле бүләккә мәгълүмат чара­ла­ры­ның һәм полиграфиянең 20 хезмәткәре лаек булды. Бүләк­ләр­не республиканың Матбугат һәм киңкүләм мәгълүмат агентлыгы җитәкчесе Борис Мелкоедов белән мәдәният хезмәткәрләре профсоюзы рәисе Александр Кузьменко тапшырдылар.

— Күрүебезчә, бүләкләнүчеләр арасында журналистлар гына түгел, ә шушы өлкәдә эшләүче башка хезмәт ияләре дә бар. Бу дөрес тә, чөнки яхшы китап, гәзит чыгару өчен бик күпләрнең хезмәте таләп ителә. Болар — версткалаучылар, водительләр, хәреф җыючылар һәм башкалар. Аларның хезмәтен дә күрә белүегезгә мин ихлас шат, — диде Борис Николаевич.

Бүләкләнүчеләрне хезмәт коллективлары сайлаган, республика Профсоюзлар комитеты раслаган.

— Без Матбугат һәм киңкүләм мәгълүмат агентлыгы белән яхшы мөнәсәбәттә. Күптән түгел хезмәттәшлек турында килешү төзедек. Бу югары бүләкне сезнең мөһим һәм кирәкле хезмәтегезне лаеклы бәяләү дип кабул итәм, — диде  Александр Кузьменко.

Мактау грамотасына лаек булучылар арасында Чакмагыш районы редакция-нәшрият комплексының полиграфия продукциясен сату бүлеге мөдире Заһира Әхмәтова, Уфа полиграф­комбинатының участок операторы Нәсимә Исхакова, Яңавыл телевид­е­ниесе һәм радиосы өлкән видеооператоры Рудольф Иштубаев, Башкортстан “Китап” нәшриятының нәфис әдәбият редакциясе мөхәррире Гөлназ Фазлыйәхмәтова, Аскын районының “Надежда” редакция-нәшрият комплексы бухгалтеры Гафифә Хәкимова да бар иде. Алар барысы да бу вазыйфаларында 20-30 ел хезмәт салган.

Федераль министрлыкның бу бүлә­генә матбугат, киңкүләм мәгълүмат чараларында, нәшриятта һәм полиг­рафиядә ун елдан артык эшләгән хезмәткәрләр бүләкләнә. Соңгы елларда аңа республика Профсоюзлар комитеты тырышлыгы белән тармакның 70 кешесе лаек булган.

Резеда Галикәева.

Фото: Гөлназ Фазлыйәхмәтова, Гафифә Хәкимова, Рудольф Иштубаев, Заһира Әхмәтова һәм Нәсимә Исхакова.