27.09.2014 - Җәмгыять

Көзләрдә җылыта җәй яме

Икмәкле дә, җырлы-моңлы да Илеш төбәге. Фидакарьлегенә олы бәя алган, тырыш хезмәт җимешләрен татыган кешенең күңеле күтәренке, җаны тыныч була. Ә эшеннән, тормышыннан канәгать булганнар матурлыкка омтыла.

Район үзәге Югары Яркәй авылы халкына да хас бу сыйфат. Биредә үзләре яшәгән мохитне ямьләү — аларның һәркайсының диярлек теләге. Шулай булмаса, төзекләндерү эшләре иртә яздан көзгәчә дәвам итәр идемени?! Югары Яркәй авыл биләмәсе хакимияте башлап йөргән эшләрне халык күтәреп ала. Биредә урнашкан 90нан артык предприятие һәм оешма хезмәткәрләре, мәктәп укучылары өмәләргә дәррәү чыга. “Бергә һәм бердәм эшлибез, җыештыру, тәртип урнаштыру — уртак бурычыбыз”, — ди авыл хакимияте башлыгы Рамил Хәерт­ди­нов.
Быел яз зур эш-мәшәкать­ләрдән башланган. Яңа бистә­дә шәхси йорт төзүчеләр өчен участоклар бүленгәч, саклагыч полоса рәвешендә дүрт рәт агач утыртылып, коймалап алын­ган.
Үзе яшәгән төбәккә битараф булмавы халыкның авыл хакимиятенә төзекләндерүдә төрле тәкъдимнәр белән ки­лүен­нән дә аңлашыла. Хез­мәтк­әрләр моңа бик шат. “Югары Яркәй үрнәгендә бөтен райо­нның йөзе чагыла”, — дигән фикердә хакимият башлыгы урынбасары Алсу Мослыхова. Шуны куәтләп, соңгы берничә елда биредә чәчәкләр үстерүгә ныклап керешкәннәр. Мәйданда, үзәк урамнарда гына түгел, башка урыннарда да җәй буе күзнең явын алып утыра алар. Элек үсентеләрне читтән кайтарткан булсалар, быел алар Илеш җирендә үстерелгән.
Чәчәклекләрне карау-тәр­бияләү өчен 4-5 кешелек бригада булдырылган. Үсенте­ләр утыртудан башлап, җәй буе алар­га су сибү, чүп утау һәм башка эшләрне башкарган алар. Түтәлләрдә чәчәкләрдән төрле композицияләр ясауда мәктәпләрнең биология укытучылары — төп киңәшчеләр, ди Алсу Рим кызы. Бер-бер­сенең фантазиясен баетып, иҗади эзләнүләр нәтиҗәсендә туа матурлык.
Район үзәгендәге ике катлы йортларда яшәүчеләр арасында игълан ителгән иң матур йорт, ихата һәм иң яхшы сәүдә ноктасы бәйгесенә Республика көнендә йомгак ясалачак. Шәхси йорт хуҗалары арасындагы конкурста күптөрле номи­нацияләр буенча җиңүчеләр исә ел саен үткәрелүче Чәчәк бәйрәмендә игълан ителгән. Гөл-чәчәкләргә күмелеп утыручы ихаталар бихисап Яркәй­дә, бүләкләнү­че­ләр дә күп булган.
Күз карашын иркәләүче матурлык, искиткеч төсләр балкышы, табигатьнең соклангыч бүләге күкрәп утырган чагында сула, дип күңелсезләнергә ашыкмыйк, күңелдә бихисап тәэссоратлар, киләсе язга өмет-ышаныч калдырып китә бит алар. Шуңа алтын көзләрдә дә җәй яме безне җылытып тора.

Резеда НУРТДИНОВА.
Илеш районы.


Вступить в группу KizilTan.ru «ВКонтакте»