29.05.2013 - Әдәбият

Илһам баскычлары

Балтач авыл мәдәният йортларында район күләмендәге төрле чаралар үткәрү күптән матур традициягә әверелде. Мәсәлән, Комъязы авылында башланган “Уйна, гармун!” бәйгесе, район чикләрен узып, ут күршеләрне дә җәлеп итте, Сәйтәктә — бию, Тушкырда — җыр, Түбән Сикиязда үзешчән театр конкурслары үткәрелә. Шундый чараларның берсе — һәр яз табигать уянган чакта үткәрелүче “Илһам баскычлары” шигърият бәйгесе. Ул Нөркә авылы мәдәният йортында быел җиденче тапкыр узды. Бәйге  Башкорт­станның күренекле язучылары, шагыйрьләре, публицистларының тарихи мирасын өйрәнү, шушы төбәктә яшәүче нәфис сүз осталарының, танылу алган һәм шигърияткә яңа аяк баскан һәвәскәр шагыйрьләрнең иҗатына, аларның үсүенә ярдәм итү йөзеннән оештырыла.

Район хакимияте урындагы автор­ларның китапларын нәшер итүгә зур игътибар бирә. Нәтиҗәдә соңгы елларда байтак каләм тибрәтүче үзлә­ренең иҗат җимешләрен күрү бәхетенә иреште. Узган елда Рәфис Шәй­хәй­дәровның “Батырша эзләрен­нән” дигән басмасы дөнья күрде. Анда туган төбәкнең өч гасырлык тарихы сыйган. 2010 елда шушы ук авторның “Балтач мәчетләре” дигән хезмәте китап сөючеләр игътибарына тәкъдим ителгән иде. Соңгы елларда Мөкатдис Сәмиевның “Бәхетле тормыш киңлеге”, Гөлшат Ихсанованың “Күңелем гөл­ләре”, Габделсамат Гатинның “Яшәеш мәзәк­ләре”, “Көлгәнгә — көлке”, Әхнәф Мазһаровның “Күңелем җырлары”, “Күңелем табышлары”, Гөлнара Шәймөхәм­мәто­ваның “Алмалы үлән­нәрем”, Аида Хәйретдино­ваның “Яшьлек җырым”, Хатыйп Сираевның “Утлы еллар аша” китаплары басылды. Өметле авторлар да игътибардан читтә калмый. Урындагы язучыларның байтак әсәрләре “Туган җирдә туган хисләр” җыентыгында урын алган.

Районның мәдәният бүле­ге, үзәк китапханә, “Балтач таңнары” гәзите редакциясе коллективлары нәфис сүз осталарына, һәвәскәр шагыйрьләр һәм язучыларга иҗат дәрә­җәсен күтәрү юнәлешендә даими ярдәмләшә, алар катнашлыгында төрле чаралар үт­кәрелә, язмалары гәзит битләрендә дөнья күрә.

Балтач җире — талантларга бай төбәк, алар арасында үзен шигърияткә һәм нәфис сүзгә багышлаучылар да байтак. Нөркә авылында үткән “Илһам баскычлары” бәйгесе моңа ачык дәлил булды һәм анда йөзгә якын конкурсант катнашты. Мәртәбәле жюригә алар арасыннан иң-иңнәрен билгеләү җиңел булмады. Хәер, чараны оештыручылар һәм аның иганәчесе булган “Балтач таңнары” гәзите редакциясе бәйгедә катнашучы­ларның берсен дә игътибардан читтә калдырмаган. Шигърият сөючеләр унсигез номина­циядә бил­геләнде. Һәр кон­курсның җиңүче­ләре була. “Автор иҗаты” һәм “Сән­гатьле уку” категорияләрендә өченче урынны Фәйхүнә Әхкәмова, Зәлфирә Гатина, Чулпан Җиһангирова, Рәзинә Ханнанова; икенче урынны Рәйсә Гыйбадуллина, Нэля Гыймаева, Рәзилә Шәрифнурова яулады. Түбән Сикияздан Флүзә Кашанова һәм Иске Балтачтан Фәнәзия Вәлиева беренче урынга даек булдылар.

Шигъриятне үз итүчеләр белән очрашуга республи­каның танылган каләм осталары Марат Кәримов, Мөнир Вафин, Мөхәммәт Закиров, Нөркә авылында туып-үскән, хәзер Татарстанда яшәп иҗат итүче Лира Галиева, якташлары, Бөтендөнья татар конгрессының Башкортстандагы вәкиле Алик Локманов килгәннәр иде. Алар үз чыгышларында районда язучыларга булган карашка югары бәя бирде, бу эшкә яшьләрне күбрәк җәлеп итәргә тырышырга, Башкортстан Язучылар берлеге әгъзалары булырлык итеп үстерергә кирәклеген әйттеләр, яңа шигырьләре белән таныштырдылар.

Конкурсны йомгаклап, район хакимияте башлыгы Рәфил Галләмов шигърият сөючеләр­не хәзерге заманның да уңай якларын күрә белергә, үз иҗатларында халыкны тырыш хезмәт белән мул тормышта яшәргә өндәргә чакырды. Ул, шулай ук, бу чараны оештыруда Нөркә авыл Советы хаки­миятенең, мәдәният йортының һәм мәктәп коллективының күп көч салганлыгын ассызыклады.

Шул ук көнне кич конкурс­ның гала-концерты үтте. Бәйрәм башланыр алдыннан кунаклар һәм чарада катнашучылар мәдәният йорты алдында агачлар утыртты. Концертта үзешчән шагыйрьләр һәм нәфис сүз осталары чыгышлары Нөркә авылы мәдәният йортының һәвәскәр артистлары һәм мәктәп укучылары чыгышлары белән үрелеп барды.

Марат Зыятдинов,

“Кызыл таң”ның үз хәбәрчесе.

Балтач районы.

Фото: Үзешчән шагыйрәләр Фәйхүнә Әхкәмова, Гөлфирә Җиһангирова һәм Зөһрә Сәләхованың Марат ага Кәримов белән уртак сүзләре күп.