20.08.2013 - Көнүзәк

Һәркем җаваплылык тойсын!

Юлдагы хәлне бик тиз бәяләп һәм аның үзгәрүен күз уңында тотып, хезмәткәрләр утырган “Шкода-Октавиа” шәһәрдән чыгу юлына юнәлде. Руль артында — полиция капитаны Эдуард Идрисов. Аның белән әңгәмә патруль автомобилендә башланды. Ул инде сигезенче ел Русия Эчке эшләр министрлыгы ЮХХДИ идарәсенең Уфа шәһәре буенча юл-патруль хезмәте полкында хезмәт итә.

Бала чакта Эдуард тарих белән мавыга, тарихта эз калдырган кешеләр белән кызыксына. Ул кешенең язмышы үз кулында булуына ышана. Шуңа да алдынгы укучы математика буенча олимпиадаларда уңыш­лы чыгыш ясый, спорт белән шөгыльләнә.

— Иң мөһиме — үз көчеңә ышанырга һәм ялкаулашмаска, — ди Эдуард.

Өлкән сыйныф укучысы үзаллы шөгыльләнә. Студент елларында өстәмә белем алуы аңа нык ярдәм итә һәм егет ике энесе өчен үрнәк була. Малайлар өчен әти-әниләренең “Үз эш-гамәлләрең өчен үзең җавап бир!” дигән сүзләре тормыш девизына әверелә.

Язмыш Эдуардны һәрвакыт талантлы, акыллы кешеләр белән очраштыра. ЮХХДИ идарәсенең юл-патруль хез­мәте полкына килгәч тә шулай була. Беренче  сөйләшүгә аны юл-патруль хезмәте полкы командиры, милиция полковнигы Флорид Сәлимҗанов чакыра.

— Минем белән кул биреп күрешкәч, Флорид Флүр улы “Алачаксыңмы?” — дип сорады. “Нәрсәне?” — дип сорыйм, аңламыйча. “Акча, ришвәт ала­чаксыңмы?” — дип катгый кабатлады командир. “Юк”, — дидем. “Уку үзәгенә стажировкага җибәрегез”, — дип боерды полковник Сәлимҗанов, — дип хәтерли Эдуард.

Яшь инспектор беренче тапкыр кулга корал алгач кына җаваплылыкны бөтен җитди­ле­гендә тоя. Ул көнне Илшат Ху­җагалиев белән хезмәткә ке­решә. Беренче кизү торуы Ин­тер­националь —  Комаров урамнары чатында үтә һәм вакыйгаларга бай була. Шуларның берсе —  исерек шофер белән очрашу. Әмма яшь инспектор уяу була.

— Тәҗрибәсе бөтенләй булмауга карамастан, хезмәт­тә­шем конфликтны дөрес хәл итте, — дип хәтерли батальон командиры урынбасары, полиция өлкән лейтенанты Илшат Хуҗагалиев. — Шофер­ның дорфалыгы бик тиз юкка чыкты.

Көн артыннан көн үтә, киеренке кизү торулардан соң Эдуард үзенең хезмәт юлын  дөрес сайлавына ныграк инана бара. Бер фаҗигале очрактан соң ул моңа тулысынча ышана. Шул ук елның җәендә башка­ланың Черниковка бистәсендәге Хәкимов урамында бер исерек шофер баланы бәрдерә. Ар­миядән кайткан яшь егет, дуслары белән автомобилен “юып”, юлга чыга. Беренче  көн­не үк бер гаепсез бала таптала.

— Ул көнне мин менә шундый кабахәтләрнең кара эшләрен булдырмас өчен барлык тырышлыгымны салырга карар иттем, — ди Эдуард.

Сигез ел эшләү дәверендә дорфа, үзенең хаклыгына һәм җәзасызлыгына инанган шоферлар азаймады, әлбәттә. Инспекторга ачу белдерүче, аңа янаучы кешеләр бүген дә очрый. Һөнәри осталык, тынычлык саклый белү  инспектор өчен мөһим сыйфатлар булып кала.

— Ул — бик принципиаль, Эдуард өчен закон алдында барысы да тигез, — ди поли­ция­нең өлкән лейтенанты Виталий Пфлугфельдер.

Дүрт ел элек шундый бер очрак була. Өлкән лейтенант Идрисов чит ил машинасындагы шоферны туктата. Ул шәһәр Советы депутаты булып чыга, әмма шофер таныклыгы тартып алына. Ярты сәгатьтән шул ук урам чатында юл-транспорт вакыйгасы теркәлә. Шул ук депутат бик нык исерек килеш идарә иткән “Хундай” машинасы (инде икенче машина) дүрт транспорт чарасы бәрелешүгә сәбәпче була. Очраклылык белән генә корбаннар булмый.

Бүген инде полиция капитаны Идрисов  — Русия Эчке эшләр министрлыгы ЮХХДИ идарә­сенең Уфа шәһәре буенча юл-патруль хезмәте полкының рота командиры. Гуманитар академиянең юридик факуль­тетының дүртенче курсын тә­мамлаган. Аның җитәк­че­ле­гендәге подразделениедә 76 кеше хезмәт итә. Эдуард Әхнәф улы аларның һәркайсы өчен җавап бирә.

— Аларның яртысыннан күбрәге миннән өлкәнрәк. Туганымдай күргән хезмәттәш­лә­ремнең һәркайсы өчен борчылам. Дәүләт автоинспек­циясендә дә кешеләр эшли, алар да әле авырып китә, әле кемнеңдер гаиләсендә проблемалар була. Шундый хәлләрдә кешеләргә ярдәм итәргә тырышам, — ди командир.

Светлана Әсәнова.


Вступить в группу KizilTan.ru «ВКонтакте»