Гражданлык никахын дин дә, җәмәгатьчелек тә хупламый

“Гаиләдә дин тәрбиясе” дигән темага оештырылган конференциягә Салават шәһәре хакимияте, балигъ булмаганнар эшләре комиссиясе вәкилләре, мәктәп һәм колледжлар укучылары, шулай ук протоиерей Роман Уточкин һәм киңкүләм мәгълүмат чаралары хәбәрчеләре чакырылган иде.

Очрашу шәһәрнең җә­мигъ мәчетендә булды. Чараны ачып, Рамил хәзрәт Насыйров белән Роман атакай көн тәртибенә чыгарылган тема­ның актуальлегенә басым ясап, гаиләдә дин тәрбиясенең тормыш талә­бенә әверелүен конкрет мисаллар белән исбатладылар, конференциядә катнашучыларга уңышлар теләделәр.

— Бу көнүзәк тема буенча сөйләшү республика дәрәҗә­сендә дә дәвам итәчәк. 20 майда Стәрлебаш районы үзә­гендә узачак “түгәрәк өстәл” артына шәһәр һәм авылларда яшәүче Ислам, православие һәм католиклар динендәге яшьләр чакырыла. Диалогта катнашырга теләүчеләрне көтеп калабыз, — диде Роман атакай.

“Яшьләрне гаилә тормышына әзерләү” дигән темага доклад белән Русия Ислам университеты мөгаллимәсе Асия ханым Шәрифуллина чыгыш ясады. Урындагы мисалларга нигез­ләнеп, ул бүгенге көндә яшьләр арасында гадәти хәлгә әверел­гән никахсыз яшәүнең дини яктан да, мәгыйшәт күз­ле­геннән дә бары тик бәхет­сезлеккә алып килә торган чынбарлык икәнлеген дәлил­ләде. Чыннан да, ата яки ана булып карап, соңыннан бер-берсен ошатмаган яшьләр берничә айдан аерылыша. Нәтиҗәдә, сабый никахтан тыш дөньяга килә. Аның язмышы аянычлы.

— Кызганычка каршы, бу — әхлаксызлык. Никахсыз яшәүне җәмәгатьчелек хупламый, бу Раббыбыз алдында да зур гөнаһ санала, — диде Асия Хантимер кызы.

Тәҗрибәле мөгаллимә Гайшә Абдуллина да дин кануннары кысаларында ир белән хатын арасындагы мөнәсәбәтләргә тукталды, залда утыручыларның сорауларына төпле җавап бирде.

Укытучы Саҗидә  Нишанова чыгышыннан бер генә өземтә китерәм: “Ислам кануннары буенча хатын-кыз үзен намуслылык, горурлык, сафлык пәрәнҗәсе белән капларга тиеш”. Педагоглар Чулпан Сәлимова, Фатыйма Сәлимгулова да дини яссылыкта яшьләрне гаилә тормышына әзерләү, бала тәрбияләү, ниһаять, Аллаһ биргән олы бүләк — мәхәб­бәт нигезендә бәхетле гаилә коруда Ислам диненең әх­лакый нигезләре турында сөйләделәр.

Чәй өстәле артында дә­вам иткән конферен­ция­нең икенче өлеше дә истә калырлык булды. Анда катнашучылар гаиләдә бала тәрбияләүгә кагылышлы көнүзәк теманың мөһим­леген сызык өстенә алды, чараны оештыручыларга рәхмәт сүзләре әйтте. Сөй­ләшүдә яңгыраган фикер­ләрне һәр үсмернең күңе­ленә салырга кирәк дигән нәтиҗәгә килде. Чыгыш ясаучылар үзләрен борчыган күп сорауларга җавап алды, әлеге проблема буенча тәгаен чаралар  тәкъдим итте.  

Минҗан Зарипов.

Салават шәһәре.